ஒட்டகத்தை கொன்ற சிங்கம் - பஞ்ச தந்திர கதைகள்!

காடுகளின் ராஜாவான சிங்கத்திற்கு காகம், நரி , புலி போன்றவை அமைச்சர்களாக இருந்து வந்தது. ஒருமுறை ஒட்டகம் ஒன்று வழிதவறி அந்தக் காட்டிற்குள் வந்து விட்டது. மற்ற அமைச்சர்கள் ஒட்டகத்தை சிங்கத்திடம் கொண்டு போய் விட்டன. சிங்கம் வழி தவறிய ஒட்டகத்திற்கு அடைக்கலம் கொடுத்து அதனையும் தன்னுடைய அமைச்சரவையில் இணைத்து கொண்டது.

பல நாட்கள் எல்லாம் ஒன்றாக ஒற்றுமையுடன் கிடைத்த உணவை பகிர்ந்து உண்டு வாழ்ந்தன . ஒரு முறை சிங்கம் நோய்வாய்ப்பட்டது. தன்னுடைய அமைச்சர்களிடம் என் பசியைத் தீர்க்க ஏதாவது உணவு கொண்டு வாருங்கள் என்று கூறியது.

அமைச்சர்கள் நால்வரும் காடெங்கும் தேடி அலைந்தும் ஒரு இரையும் அகப்படவில்லை. ஆகவே நான்கும் வெறும் கையுடன் திரும்பி வந்தன.

இன்னும் சில நாட்கள் போனால் சிங்கத்தின் பசிக்கு தாங்கள் இரையாகி விடலாம் என்கிற கவலை மற்ற மிருகங்களுக்கு இருந்தது. ஆகவே காகம் ஒரு யோசனை தந்தது. ஒட்டகத்திற்கு தெரியாமல் தன்னுடைய பழைய சகாக்கள் ஆன புலி மற்றும் நரியை அழைத்துக் கொண்டு சிங்கத்திடம் சென்றது.

மன்னரே காடு முழுதும் நாங்கள் அலைந்து திரிந்தும் உங்களுக்கான இரை கிடைக்கவில்லை என்று பணிவுடன் காகம் கூறியது.

அப்படி என்றால் என் பசிக்கு என்ன பதில் சொல்ல போகிறீர்கள். உங்கள் கருத்துதான் என்ன என்று சிங்க ராஜா வினவியது.

மன்னரே தங்களுடைய பசி போக்கும் ஒரே மருந்து ஒட்டகம் மட்டுமே என்று காகம் கூறியது.

சிவசிவ என்று சிங்கம் தன்னுடைய காதுகளை மூடிக் கொண்டது.

உடனே காகம்

ஒரு குடியைக் காக்க ஒரு மனிதனைக் கொல்லலாம் . ஒரு நகரைக் காப்பாற்ற ஒரு குடியைக் கெடுக்கலாம். ஒரு ஒரு நாட்டைக் காப்பாற்ற ஒரு நகரையே அழிக்கலாம். இந்த நீதியை வைத்துதான் பஞ்சபாண்டவர்கள் தங்கள் மகன் அரவானை போர்க்களத்தில் பலியிட்டு வெற்றி பெற்றனர் என்று நயமாக பேசியது.

நீ என்ன சொன்னாலும் அடைக்கலமாக வந்தவர்களை உணவாக்கி கொள்வது பாவம் என்று சிங்கம் மீண்டும் மறுத்தது

உடனே காகம் சரி அரசே அடைக்கலமாக வந்தவர்களை நீங்கள் கொல்ல வேண்டாம். ஒட்டகத்தின் ஒப்புதலின் பேரிலேயே அது உங்களுக்கு உணவானால் நீங்கள் ஏற்று கொள்ள வேண்டும் என்று கூறியது.இதற்கு சிங்கம் மறுமொழி ஏதும் சொல்லவில்லை.

சிங்கத்தின் மௌனத்தையே சம்மதமாக எடுத்துக் கொண்ட காகம் நரி மற்றும் புலியை அழைத்துக் கொண்டு அங்கிருந்து நகர்ந்து சென்றது.

ஒட்டகம் தனியாக திரும்பி வந்து சேர்ந்தது. உடனே நரி புலி மற்றும் காகம் ஆகிய மூன்றும் சிங்கத்தை பார்த்து மன்னரே உங்களுக்கான உணவு எங்கு தேடியும் கிடைக்கவில்லை என்னை உண்டு உங்கள் பசியைப் போக்கி கொள்ளுங்கள் என்று காகம் கூறியது.

உன் உடல் எனக்கொரு உணவாக முடியுமா என்று சிங்கம் கேட்டது.

உடனே நரி முன் வந்து என்னை உங்கள் உணவாக்கி கொள்ளுங்கள் என்றது

சிங்கம் உன் உடலாலும் என் பசி அடங்காதே என்றது

இப்போது புலி சொன்னது மன்னரே என்னை நீங்கள் உண்ணலாம் என்று அனுமதி கொடுத்தது.

நீயும் எனது பசிக்கு போதுமானவன் அல்லவே என்று சிங்கம் மறுத்து சொன்னது.

இதைப் பார்த்த ஒட்டகத்திற்கு தன்னைக் கொல்லத்தான் இந்த சூழ்ச்சி நாடகம் எனப் புரிந்து போனது. ஆனாலும் அடைக்கலமாக வந்த அதற்கு வேறு வழியில்லை. ஆகவே நான் மிகுந்த தசைகளைக் கொண்டிருக்கிறேன். என்னை உண்ணுங்கள் என்று கூறியது.

ஒட்டகம் சொல்லி முடிப்பதற்குள் சிங்கம் என்ன பதில் சொல்லப் போகிறது என்பது தெரிவதற்குள் புலி பாய்ந்து ஒட்டகத்தினை அடித்துக் கொன்றது.சிங்கம் இறந்து போன ஒட்டகத்தின் ரத்தத்தை குடித்தது. புலி அதன் மூளையைத் தின்றது.நரி ஒட்டகத்தின் ஈரலைக் கடித்து தின்று மகிழ்ந்தது. காகமோ ஒட்டகத்தின் தசைகளை கொத்தி உண்டு பசியாறியது.

நீதி: கொடியவர்களுடன் கூடியவர்கள் மடிவது உறுதியானது. நல்லவர்கள் அல்லாதவர்களோடு சேரக் கூடாது.