நான்கு நண்பர்கள் - பஞ்ச தந்திர கதைகள்!

அறம் பற்றி உங்கள் குழந்தைகளுக்கு எடுத்துரைக்க இதனை விட அருமையான கதை இருக்க முடியாது. ஏகப்பட்ட வாழ்க்கை தத்துவங்கள் இக்கதையில் இருக்கின்றன. கூர்ந்து படித்து குழந்தைகளுக்கு சொல்லுங்கள். நல்வழியில் நடத்துங்கள்.

கோதாவரி ஆற்றின் கரையின் அருகில் ஒரு அடர்ந்த வனம் இருந்தது.அங்கிருந்த இலவம் மரத்தில் ஒரு காகம் வாழ்ந்து வந்தது. தன்னுடைய இனத்திற்கு மீறிய ஒரு அறிவு அந்த காகத்திற்கு எப்போதும் இருந்தது.

ஒரு நாள் காகம் தன்னுடைய இனத்தாருடன் குளித்து விட்டு தன்னுடைய சிறகுகளை உலர்த்தி கொண்டிருந்தது. அப்போது கொடிய வேடன் ஒருவன் வலை மற்றும் வில் அம்புகளாடு அங்கே வந்தான். அதனால் அனைத்து காகங்களும் பதறியடித்து பறந்தன. ஆனால் இந்த காகம் மற்றும் ஒரு மரத்தில் ஒளிந்து கொண்டு வேடன் என்ன செய்கிறான் என்பதை கண்காணித்தது.

அந்த வேடன் வலையை விரித்து அதனை சுற்றி தீனியும் போட்டான். மறைவான இடத்தில் இருந்து ஏதேனும் பறவைகள் அகப்படுகிறதா என்றும் பார்த்துக் கொண்டிருந்தான்.

அப்போது புறாக்கள் கூட்டம் அருகில் இருந்த மரத்தில் இறங்கியது. புறாக்களுக்கோ தானியங்களை பார்த்ததும் சந்தோஷம் வந்தது. ஆனால் அதில் இருந்த புறாக்களின் அரசன் அது ஏதேனும் சதியாக இருக்கலாம் என சக புறாக்களை எச்சரித்தது.

காட்டில் தானாக தானியம் கிடந்தால் அது யாரேனும் கொண்டு வந்து போட்டதாக இருக்கும். ஆகவே உண்ண வேண்டாம் என எச்சரித்தது.

மற்ற புறாக்களோ ஒவ்வொன்றுக்கும் இப்படி யோசித்து கொண்டிருந்தால் நாம் இரையே உண்ணாமல் இறக்க வேண்டியது தான்.எந்தெந்த காலத்தில் என்னென்ன நடக்கவேண்டுமோ அது அப்படியே நடக்கும் என்று சொல்லி தானியங்களை கொத்த சென்று வேடன் விரித்த வலையில் மாட்டின.

இதைக் கண்ட புறாக்களின் ராஜா நம்முடைய இனம் அழியும்போது நான் மட்டும் இருந்தென்ன பயன் என்று கூறி தானும்  அந்த வலையில் வலிய சென்று சிக்கி கொண்டது.

அப்போது புறாக்களின் அரசனுக்கு ஒரு யோசனை தோன்றியது. நாம் அனைவரும் ஒன்றாக பறந்தால் வேடனால் பிடிக்க முடியாது. நாம் தப்பித்து விடலாம் என யோசனை சொன்னது. புறாக்களும் வலையோடு பறந்தன.

வேடன் துரத்தி சென்றும் அவைகளை பிடிக்க முடியவில்லை.புறாக்களும் கிடைக்கவில்லை அதோடு வலையும் பறிபோனதே என்று புலம்பியபடி வேடன் சென்றான். நடந்த அத்தனையையும் இலவ மரத்து காகம் பின் தொடர்ந்து சென்று பார்த்தது.

வலையோடு பறந்த புறாக்கள் ஒரு  எலி வளை முன்பு இறங்கின. புறாக்களை கண்டு பயந்த எலி வளைக்குள் சென்று விட்டது. அந்த எலி புறாக்களின் ராஜாவுக்கு நீண்ட கால நண்பன். எலி நண்பனே நான்தான் வெளியே வா என புறாக்களின் அரசன் அழைக்கவே அறிந்த குரல் என எலி வெளியே வந்தது.

வலையில் சிக்கி இருந்த தன்னுடைய நண்பனான புறா அரசனை கண்ட எலி அறிவும் திறமையும் மிக்க நீயும் கூடவா இதில் மாட்டிக் கொண்டாய் என வருந்தியது.

எவ்வளவு சிறந்த அறிவாளியாக இருந்தாலும் எத்தனை சாமர்த்தியம் இருந்தாலும் விதியின் கோட்டை மீற முடியுமா ? எந்த காலத்தில் எந்த இடத்தில் எப்படிப்பட்ட காரணத்தால் யாரால் எவ்வளவு நல்வினைகள் தீவினைகள் அனுபவிக்க வேண்டுமோ அந்தந்த இடத்தில் அந்த காரணங்களால் அவரால் அனைத்தையும் அனுபவித்துத்தானே தீர வேண்டும் என புறாக்களின் அரசன் பதில் உரைத்தது.

மீன்களும் பறவைகளும் வலைகளில் சிக்குகின்றன. மலைக்குன்று போலிருக்கும் பெரிய பெரிய யானைகளும், தன்னுடைய விஷத்தால் அனைவரையும் கொல்லும் தன்மை படைத்த பாம்புகளும் தன்னுடைய வலிமை மறந்து போய் தம்மை பிடிப்பவர்களிடம் கட்டுண்டு கிடக்கின்றன, சூரியனும் சந்திரனும் பாம்பிடம் சிக்குகின்றன. அறிவில் சிறந்த புலவர்கள் வறுமையில் கிடப்பதும் அறிவற்றவர்களிடம் செல்வம் சேருவதும் எல்லாம் அவரவர் நல்வினை தீவினைப் படியே நடக்கிறது.இந்த வினைப்பயனை யாராலும் புறக்கணிக்க முடியாது என்று பதில் சொன்ன எலி தன்னுடைய பற்களால் வலையினை அறுத்து புறாக்களை காப்பற்றியது

எலியின் இந்த செயல்கள் காகத்தை கவர்ந்தது. எலி வளைக்குள் அலகை நீட்டி எலியை அழைத்தது.

நீ யார் ஏன் என்னை அழைத்தாய் என்று எலி கேட்டது.

நான் ஒரு இலவ மரத்து காகம். ஒரு புறா அரசன் பின்னால் வந்தேன். அவர்களை காப்பாற்றிய உன் பெருந்தன்மை குணம் என்னைக் கவர்ந்தது.உன் நட்பு திறன் மற்றும் பாச உணர்வுகள் என்னையும் உன்னுடன் நட்பு கொள்ள வேண்டும் என்று தூண்டின. அதனாலேயே உன்னை அழைத்தேன் என்றது.

அறிவு கொண்ட அந்த எலி, நானோ உன்னால் உண்ணப்படும் இரைகளில் ஒன்று. நான் எப்படி உன்னுடைய நண்பனாக முடியும். எலிகளை கொன்று தின்னும் கூட்டத்தை சேர்ந்த உன்னுடன் நான் நட்பு கொண்டால் அது எனக்கு பேராபத்தாகவே முடியும் என எலி மறுத்து பேசியது.

இதை கேட்ட காகம் மனம் நெகிழும்படி , ஐயோ என்ன வார்த்தை சொல்லி விட்டாய். உன்னை கொன்று தின்றால் ஒரு  நாள் மட்டுமே பசி ஆற முடியும். மாறாக உன்னுடன் நட்பில் இருந்தால் எத்தனையோ காலங்கள் நாம் ஒன்றாக வாழலாமே என்று கூறியது. அந்த புறா அரசனிடம் நீ நட்பாக இருப்பது போல என்னுடனும் இருந்தால் என் உயிர் உள்ளவரை உன்னை காப்பேன் இன்றி கூறியது.

உங்கள் காக்கை புத்தி நிலையில்லாதது. உன்னை நண்பனாக சேர்ப்பதன் மூலம் என்னுடைய செயல்கள் எதுவும் மாறப்போவதில்லை. உன் நட்பால் எனக்கு ஆகப்போவதும் ஒன்றும் இல்லை. கப்பலை தரையிலும் தேரை கடலிலும் ஓட்ட முடியாது. சேர கூடாதவைகள் சேர்ந்தால் அந்த உறவு திடமாக இருக்காது. கெட்டுபோகுமே தவிர நன்மை எதுவும் இருக்காது. ஒழுக்கம் கெட்டவர்களிடத்து நியாயத்தை எதிர்பார்த்தும் , தீயவர்களிடம் நன்மை செய்து கொள்ள எதிர்பார்த்து நட்பு கொண்டு அதனால் நன்மை அடைந்தவர் என்று யாரும் இங்கே இல்லை. பாம்பை மடியில் கட்டிக் கொண்டு பயணிப்பவர் போல பயந்தே சாக வேண்டியதுதான் என்று எலி மீண்டும் மறுத்துரைத்தது.

அதற்கு காகம். இரும்பை கண்ட உடன் காந்தம் போய் ஒட்டி கொள்ளும். அதே சமயம் இரும்பு துண்டுகளோ நெருப்பில் வாட்டி வருத்தப்பட்ட பின்னரே ஒன்றாக ஒட்டிக்கொள்ளும்.அதை போலவே நல்லவர்கள் கண்டவுடன் நண்பர்கள் ஆகி விடுவார்கள். ஆனால் கெட்டவர்களோ தண்டனை காலத்தில் ஒன்று சேர்ந்து கொள்வார்கள்.

உன் அறிவின் உயர்வையும் உன் நெஞ்சில் கொண்ட நட்பின் தன்மையையும் அந்த நட்பை நீ பாதுகாக்கும் முறையையும் பார்த்தே நான் உன்னுடன் நட்பு கொள்ள விரும்பினேன். என்னை நீ நன்றாக புரிந்து கொள்ள வேண்டும். உன் நட்பு ஒன்றை மட்டுமே நாடி வந்திருக்கிறேன் என்று கூறியது.

காகத்தின் பேச்சால் கரைந்த எலி காகத்துடன் நண்பனாக சம்மதித்தது.

அன்று முதல் காகம் தனக்கு கிடைக்கும் இரைகளை எல்லாம் கொண்டு வந்து எலியுடன் சேர்ந்து பகிர்ந்து உண்ண ஆரம்பித்தது. எலியும் மகிழ்ந்தது. அப்போது அந்த கானகத்தில் இரை தட்டுப்பாடு ஏற்பட்டது. அதனால் காகம் எலியிடம் என்னுடைய நண்பன் ஆமை ஒருவன் இருக்கிறான். அங்கே சென்றால் அவன் வசிக்கும் குளத்தில் இருக்கும் மீன்களை பிடித்து உண்ண தருவான் என்று கூறியது.

எலியும் சம்மதித்தது. காகமும் எலியும் ஆமையும் நண்பர்களாயின. ஆமை மீன்கள் கொண்டுவரும். காகம் இறைச்சி கொண்டு வரும். எலி சோறு கொண்டு வரும். மூன்று நண்பர்களும் ஒன்றாக இணைந்து பகிர்ந்து உண்டு அன்போடு உரையாடி மகிழ்ந்தன.

இப்படி அன்பாக அவைகள் வாழ்ந்து வந்த போது ஒரு சமயம் மான் ஒன்று பயந்து வெடவெடத்து நடுங்கியபடி அங்கே ஓடி வந்தது. நடுங்குகிற மானை பார்த்து ஏன் இப்படி நடுங்கி கொண்டிருக்கிறாய் என்று அந்த மூன்று நண்பர்களும் மானை விசாரித்தனர்.

எமன் போன்ற ஒரு வேடன் என்னை துரத்தி கொண்டு வருகிறான், எனக்கு உறவு என்று யாரும் இல்லை. நீங்கள் அனைவரும் எனக்கு உதவினால் உங்களையே என் உறவினராக கருதி பாசத்துடன் இருப்பேன் என்று கூறியது மான். அதன் வார்த்தைகளில் இருந்த உண்மையால் கவரப்பட்ட நண்பர்கள் மானை காப்பாற்றினர்.

அதன்பின் பல நாட்கள் மானும் எலியும் காகமும் ஆமையும் நண்பர்களாக வாழ்ந்தனர். மீண்டும் ஒருமுறை தன்னுடைய அறிவின்மையால் மான் வேடனின் வலையில் மாட்டி கதறியது. மானை காப்பாற்ற எலி ஆமை மற்றும் காகம் ஓடி வந்தன.

எப்படி வலையினுள் மாட்டினாய் என முதலில் வந்த காகம் கேட்டது. எல்லாம் பின்னால் விவரமாக சொல்கிறேன் இப்போது என்னை காப்பாற்றுங்கள் என்றது மான். எலி தன்னுடைய பற்களால் வலையை அறுத்தது. அப்போது அங்கே வேடன் வரவே மான் தப்பித்து ஓடியது. எலி வளைக்குள் புகுந்தது. காகம் பறந்தது. ஆனால் ஊர்ந்து கொண்டிருந்த ஆமை மாட்டிக் கொண்டது. வேடன் அதனை பையில் போட்டு கொண்டு மானை துரத்தி ஓடினான்.

காகம் பறந்தபடியே மானிடம் பேசியது. ஆமை வேடனிடம் மாட்டி கொண்டதாகவும் சிறிது நேரம் மான் இறந்தது போல நடித்தால் ஆமையை காப்பாற்றி விடலாம் என்றும்கூறியது. சம்மதித்த மான் நதியோரம் இறந்தது போல படுத்திருந்தது. துரத்தி வந்த வேடன் மானை பார்த்ததும் பையை கீழே வைத்து விட்டு மானிடம் வந்தான்.

அந்த நேரம் பைக்குள் இருந்த ஆமை அருகே இருந்த நதிக்குள் குதித்து விட்டது. மான் துள்ளி எழுந்து ஓடி விட்டது. மானை துரத்தினான் வேடன். காடுகளுக்குள் புகுந்த மான் ஒரு புதரில் மறைந்தது. எலி வளைக்குள் ஒதுங்க காகம் மரத்தில் பதுங்கியது. வேடன் ஏமாற்றத்துடன் திரும்பி போனான்.

அதன் பின் நண்பர்கள் நால்வரும் சந்தோஷமாக நதிக்கரையில் வெகு நேரம் பேசிக் கொண்டிருந்தன.

நீதி : நல்லவர்கள் நட்பு போல லாபமான விஷயம் வேறொன்றுமில்லை.