சமுத்திரத்தை ஜெயித்த சிட்டுக்குருவி - பஞ்ச தந்திர கதைகள்!

ஒரு ஆண் சிட்டு கடற்கரையோரமாக வாழ்ந்து வந்தது. அதற்கொரு மனைவி சிட்டும் இருந்தது.ஒரு செடியின் கீழே கூடு அமைத்து சிட்டுக்கள் வாழ்ந்தன. பெண் சிட்டுக்குருவி சினையானது . உடனே ஆண் சிட்டுக்குருவியை பார்த்து

நான் எங்கே முட்டையிடுவது என்று கேட்டது.

எங்கே இட முடியும்? கடற்கரையை விட்டால் நமக்கு வேறு கதி இருக்கிறதா.. இங்கேதான் இட வேண்டும் என்று பதில் சொன்னது ஆண் சிட்டு குருவி

கடற்கரையில் முட்டையிட்டு அவைகளை அலை அடித்து சென்று விட்டால் நாம் என்ன செய்வது எனக் கலங்கியது பெண் சிட்டு குருவி

நாம் இன்னார் எனத் தெரிந்த பிறகும் அந்தக் கடல் நமது முட்டைகளை கொண்டு செல்லுமானால் அது நாய் படாத பாடு படும் என்று மனைவியிடம் அகங்காரம் பேசியது ஆண் குருவி

நீங்கள் பேசுவது அறிவுடையது போல தோன்றவில்லை. வாயடக்கம் இல்லாத ஆமை இறந்த கதை உங்களுக்கு மறந்து போனதா என ஆமையின் கதையையும் கூடவே மூன்று மீன்களின் கதையையும் எடுத்துக் கூறியது மனைவி.

அதெல்லாம் கிடக்கட்டும். நமக்கு உரிமையான இடம் இதுதான். இங்கேயே நீ முட்டையிடு என்று வலுக்கட்டாயமாக சொன்னது ஆண் சிட்டு

இதனைக் கேட்டு கொண்டிருந்த கடலரசன் ஓஹோ இவர்கள் சமர்த்தை நாம் பார்க்கலாம் என்று மனதிற்குள் நினைத்துக் கொண்டது. எப்படி இவர்கள் முட்டையை காப்பற்றுவார்கள் என்று பார்க்கலாம் என பெண் குருவி இட்டு வைத்த முட்டைகளை கடல் அரசன் அலைகள் மூலம் உள்ளிழுத்துக் கொண்டான்.

இதைக் கண்ட அந்த சிறு ஆண் சிட்டு குருவி கடலைப் பார்த்து, ஏ கடலே எங்கள் முட்டைகளைத் திருப்பிக் கொடுத்து விடு. இல்லையென்றால் நீ மிகவும் சிரமப்பட போகிறாய் என்றது.

கடல் ஏதும் பேசாமல் அமைதியாகக் கிடந்தது.

உடனே சிட்டுக்குருவி தன்னுடைய இனத்தாரை எல்லாம் ஒன்று திரட்டியது . சிட்டுக்குருவிகள் எல்லாம் ஒன்று கூடிய பின்னர் அவைகளை அழைத்துக் கொண்டு கருட ராஜாவிடம் பறந்து சென்றது.

கருடனிடம் சென்ற சிட்டுக்குருவி,

பறவைகளின் ராஜாவே..

பறவைக்குலத்துக்கே பெரும் பழி நேர்ந்து விட்டது. கடலரசன் எங்கள் முட்டைகளை எடுத்துக் கொண்டு போய் விட்டான். அவைகளைத் திரும்ப பெறாவிட்டால் யாரும் நம் பறவைக்குலத்தை மதிக்க மாட்டார்கள் என்று கூறியது.

உடனே கருடன் திருமாலிடம் பறந்து சென்றது. தகவல் அறிந்த திருமால் கடலரசனை அழைத்தார். ஏன் சிட்டுக்குருவியின் முட்டைகளை எடுத்தாய் உடனடியாக திருப்பி கொடுக்காவிட்டால் என் கோபத்துக்கு ஆளாவாய் என்று எச்சரித்தார்..

கடவுளின் கட்டளை கேட்டதும் கடலரசன் நடுங்கினான். சிட்டுக்குருவியின் முட்டைகளை கொண்டு வந்து அவர்களிடமே கொடுத்து விட்டான்.

நீதி : கூட்டு முயற்சி எப்போதும் வெற்றியைத் தரும்.