வேட்டைக்கு உதவிய புறாக்கள் - பஞ்ச தந்திரக் கதைகள்!

ஒரு நாள் வேடன் ஒரு பெண் புறாவை பிடித்துக் கொண்டு காட்டு வழியே தன்னுடைய வீடு நோக்கி சென்று கொண்டிருந்தான். அப்போது திடீர் என வானம் இருண்டது.சூறைக்காற்றும் வீசியது. இதனால் பயந்து போன வேடன் புறாவுடன் அங்கிருக்கும் மரம் ஒன்றின் கீழ் தஞ்சம் புகுந்தான்.

அந்த மரத்தின் மேல் இருந்த ஆண் புறா மழை பெய்ததால் தன்னுடைய பெண் புறாவை காணாமல் கலங்கியது. எங்கே சென்று சிக்கி இருக்கிறதோ தெரியவில்லை என வாய் விட்டு புலம்பியது.அப்போது வேடனுடன் கூண்டில் இருந்த பெண் புறா வாய் விட்டு பேசியது.

அத்தான் நான் இங்குதான் இருக்கிறேன். எனது முன்வினை பயனால் இந்த வேடனிடம் மாட்டிக் கொண்டேன்.இருந்தாலும் இவன் இப்போது நமது இருப்பிடம் வந்திருப்பதால் நீங்கள் இவனுக்கு உதவ வேண்டும் என்று விருந்தோம்பல் அறம் பற்றி எடுத்துரைத்தது பெண் புறா.

ஆண் புறா கீழே பார்த்தது. அங்கே தன்னுடைய பெண் புறா கூண்டிற்குள் இருக்க அதனைப் பிடித்தபடி இருந்த வேடன் மழையில் நனைந்து குளிரில் நடுங்கியபடி இருந்ததைக் கண்டது. உடனடியாக சில உலர்ந்த கிளைகளை அலகால் கவ்வி அவனுக்கு முன்பே போட்டது புறா. கூடவே எங்கிருந்தோ நெருப்பையும் எடுத்து வந்தது. சுள்ளிகளுக்கு நெருப்பு மூட்டிய புறா வேடனை பார்த்து ஐயா நீங்கள் பசியில் இருப்பீர்கள். என்னை உண்ணுங்கள் என்று தீயில் விழுந்தது.

இரண்டு புறாக்கள் பேசியதை கேட்டு கொண்டிருந்த வேடனுக்கு தனக்காக உயிர் தியாகம் செய்த புறாவை உண்ண மனம் வரவில்லை. ஆகவே கூண்டில் இருந்த புறாவையும் திறந்து விட்டான். கூண்டில் இருந்து வெளி வந்த பெண் புறா தன்னுடைய ஆண் புறாவை விட்டு வாழ விரும்பவில்லை.

ஆகவே அதுவும் ஆண் புறா விழுந்த அதே தீயில் விழுந்து உயிர் துறந்தது. அன்பால் இணைந்திருந்து அறம் செய்து உயிர் வாழ்ந்த புறாக்களை கொன்ற வேடனுக்கு குற்ற உணர்ச்சி வந்தது. மிகவும் மனம் வருந்தியபடி சென்றான்.

நீதி : நம் சுயநலத்திற்காக நல்லவர்களை துன்புறுத்த கூடாது.